სასტუმრო სტამბაში სფფ-ის 30-ე ყრილობა გაიმართა

13 სექტემბერს, სასტუმრო სტამბაში საქართველოს ფეხბურთის ფედერაციის რიგით 30-ე ყრილობა გაიმართა. ღონისძიების ფარგლებში საქართველოს ფეხბურთის ფედერაციის პრეზიდენტი, ლევან კობიაშვილი დამსწრე საზოგადოების წინაშე მოხსენებით წარსდგა. მან წინა ყრილობის შემდეგ საქართველოს ფეხბურთის ფედერაციის ძირითად პრიორიტეტებზე და ამ მიმართულებით განხორციელებულ პროექტებზე ისაუბრა.

ლევან კობიაშვილმა მიმდინარე და დაგეგმილი ინფრასტრუქტურულ პროექტებზე გაამახვილა ყურადღება. პრეზიდენტის მოხსენების თანახმად, უკვე დასრულებულია ვარკეთილისა და ფოთის საფეხბურთო ცენტრების მშენებლობა. მიმდინარე წლის შემოდგომაზე მსგავსი ტექნიკური ცენტრები გაიხსნება გლდანსა და ვაკეში. ასევე, დაგეგმილია ტექნიკური ცენტრის მშენებლობა დიდ დიღომში. დღევანდელ ყრილობაზე კი, ლევან კობიაშვილმა განაცხადა, რომ მსგავსი საფეხბურთო ინფრასტრუქტურა ნუცუბიძის პლატოზეც მოეწყობა.

პრეზიდენტის მოხსენების ფარგლებში ლევან კობიაშვილმა საფეხბურთო აკადემიების შესახებ ისაუბრა და ქართული ფეხბურთის განვითარებაში მათ როლზე გაამახვილა ყურადღება. სფფ-ის პრეზიდენტის განცხადებით რუსთავში, ზუგდიდში და ლაგოდეხში არსებულ ფეხბურთის ფედერაციის აკადემიებს სულ მალე სოფელ რუხისა (ზუგდიდის მუნიციპალიტეტი) და სოფელ გვიმბალაურის (ლანჩხუთის მუნიციპალიტეტი) აკადემიები დაემატებათ. დღევანდელ ყრილობაზე ასევე ცნობილი გახდა, რომ საქართველოს ფეხბურთის ფედერაცია მიმდინარე წლის შემოდგომაზე საფეხბურთო აკადემიის მშენებლობას ქუთაისში დაიწყებს.

შეგახსენებთ, რომ ყველა ეს პროექტი საქართველოს ფეხბურთის ფედერაციის მიერ ფიფას და უეფას სხვადასხვა პროგრამებიდან მოზიდული თანხებით ხორციელდება.

სფფ-ის პრეზიდენტმა ასევე იმ ახალ სტადიონებზე ისაუბრა, რომლებიც 2019-2020 წლებში გაიხსნა, მათ შორის, აგრანო ვაჩნაძის სახელობის სტადიონი ამბროლაურში და კასპის ცენტრალური სტადიონი. ასევე მიმდინარეობს ხაშურის ცენტრალური სტადიონის მშენებლობა.

ლევან კობიაშვილმა ასევე ისაუბრა ბათუმის ახალი სტადიონის შესახებ და აღნიშნა, რომ ეს არის ისტორიული პროექტი, რომლითაც ამაყობს არა მხოლოდ ბათუმის, არამედ მთელი საქართველოს მოსახლეობა.

ამას გარდა, მიმდინარე წლის ბოლომდე ფიფას პროგრამა ფორვარდის დახმარებით მიხეილ მესხის სახელობის სტადიონი საერთაშორისო სტანდარტების 1400 ლუქსიანი განათებით აღიჭურვება.

სფფ-ის პრეზიდენტმა დამსწრე საზოგადოებას დეტალური ინფორმაცია მიაწოდა იმ გამოწვევების შესახებ, რომელთა წინაშეც ქართული ფეხბურთი კოვიდ 19-ის პანდემიის შედეგად დადგა. შეგახსენებთ, რომ ფეხბურთის ფედერაცია გახდა ქვეყანაში პირველი სპორტული ორგანიზაცია, რომელმაც პანდემიის პერიოდში ეროვნული ჩემპიონატის განახლება შეძლო. დღევანდელი მდგომარეობით კი, ყველა შესაბამისი რეგულაციების დაცვით სფფ-ის ეგიდით მიმდინარე ყველა ტურნირი აღდგენილია და შეუფერხებლად მიმდინარეობს. მათ შორის, სამოყვარულო, ქალთა და ფუტსალის ლიგები.

ლევან კობიაშვილმა ქალთა ფეხბურთის მიმართულებით გადადგმული ნაბიჯების შესახებაც ისაუბრა და აღნიშნა, რომ ქალთა ლიგაში გუნდების რაოდენობა 14 გუნდამდე გაიზარდა, მომავალ სეზონში კი, ქალთა ჩემპიონატს მეორე დივიზიონი დაემატება.

ზემოთ აღნიშნული თემების გარდა საქართველოს ფეხბურთის ფედერაციის პრეზიდენტმა საკუთარ მოხსენებაში 2019-2020 წლებში საქართველოს ეროვნული ნაკრები გუნდების ასპარეზობა შეაფასა. სფფ-ის პრეზიდენტმა ასევე ისაუბრა მსაჯთა კორპუსისა და საფეხბურთო განათლების შესახებ.

სფფ-ის პრეზიდენტმა დამსწრე საზოგადოებას დეტალური ინფორმაცია მიაწოდა მასობრივი ფეხბურთისა და სოციალური პასუხისმგებლობის ფარგლებში ფეხბურთის ფედერაციის მიერ განხორციელებული პროექტების შესახებ.

საკუთარი მოხსენების ფარგლებში საქართველოს ფეხბურთის ფედერაციის პრეზიდენტმა ლევან კობიაშვილმა მხარდაჭერისთვის განსაკუთრებული მადლობა გადაუხადა საქართველოს მთავრობას, FIFA-ს, UEFA-ს და კომერციულ და სოციალურ პარტნიორებს.

მსოფლიოში მიმდინარე კოვიდ 19-ის პანდემიის შედეგად დაწესებული სამოგზაურო შეზღუდვების გამო სფფ-ის ყრილობაზე ჩამოსვლა ვერ მოახერხეს ფიფა-ს წევრი ევროპის ასოციაციების დირექტორმა, ნოდარ ახალკაცმა და უეფას ეროვნულ ასოციაციათა განვითარების ხელმძღვანელმა, ჯოზეფ კლიმენტმა.
საფეხბურთო ფუნქციონერები ყრილობას ვიდეო-კონფერენციის საშუალებით დაესწრნენ და დამსწრე საზოგადოებას სიტყვით მიმართეს.

სპეციალური ვიდეო მიმართვები გაავრცელეს ფიფას პრეზიდენტმა ჯანი ინფანტინომ და უეფას გენერალურმა მდივანმა თეოდორ თეოდორიდისმა. მსოფლიო და ევროპული ფეხბურთის მმართველი ორგანოების მაღალჩინოსნებმა აღნიშნეს იმ წინსვლის შესახებ, რომელიც ფეხბურთის ფედერაციას ბოლო წლების განმავლობაში აქვს და ქართულ ფეხბურთს წარმატება უსურვეს. მათ იმედი გამოთქვეს, რომ შეზღუდვების მოხსნის შემდეგ საქართველოს მალე ესტუმრებიან.

საქართველოს ფეხბურთის ფედერაციის 30-ე ყრილობაზე ქართული ფეხბურთის საიუბილეო თარიღის აღსანიშნავად ფეხბურთის განვითარებაში შეტანილი განსაკუთრებული წვლილისთვის ქართულ ფეხბურთში მოღვაწე ადამიანები დაჯილდოვდნენ. სპეციალური ჯილდო გადაეცა მეკარისთვის ბურთის უკან დაბრუნების აკრძალვის წესის ქართველ თანაავტორს - სულხან იაშვილს. ასევე დაჯილდოვდენ სფფ-ის დამფუძნებელი ყრილობის დელეგატი - მამუკა კვარაცხელია და ქართული ფეხბურთის მემატიანე - რევაზ შენგელია.

საქართველოს ფეხბურთის ფედერაციის პრეზიდენტმა სპეციალური ჯილდო გადასცა კახა შალამბერიძის ოჯახს. აღნიშნა კახას ღვაწლი ქართული ფეხბურთისთვის და მიუსამძიმრა მის ოჯახის წევრებს. შეგახსენებთ, რომ კახა შალამბერიძე წლების განმავლობაში აქტიურად იყო ჩართული ეროვნული ლიგის განვითარებაში, იგი ასევე საქართველოს ასაკობრივი ნაკრებების მედია-მენეჯერად მუშაობდა.

სფფ-ის ყრილობაზე, კენჭი უყარეს ქვემო ქართლის ფეხბურთის ფედერაციის წევრობიდან გარიცხვას არაქმედითუნარიანობის გამო. დღესვე ასოცირებულ წევრად მიიღეს ქვემო ქართლის რეგიონული ფეხბურთის ფედერაცია. სფფ-ის ასოცირებული წევრი გახდა აგრეთვე საფეხბურთო კლუბი "საბურთალო". ორივე სუბიექტმა სფფ-ის გენერალურ სამდივნოში ასოცირებული წევრობისთვის საჭირო დოკუმენტაცია წინასწარ დააფიქსირა, რომელიც აღმასკომის მიერ იქნა ინიცირებული და ყრილობაზე წარდგენილი.

ზემო აღნიშნულ საკითხებთან ერთად, ყრილობაზე სფფ-ის წესდებაში შესატანი ცვლილებები და 2020 წლის ბიუჯეტი დამტკიცდა
.----------------------------------------------------------------------------------------------------------------------------------------------------

ქართლოს ჭუმბურიძის სახელობის ტურნირი მინი ფეხბურთში 2020

დღეს, 9 აგვისტოს დასრულდა ქართლოს ჭუმბურიძის ხსოვნისადმი მიძღვნილი VI ტრადიციული ტურნირი მინი ფეხბურთში,რომელიც ტარდებოდა თერჯოლის მუნიციპალიტეტის სოფელ ბარდუბნის სათემო უბნის სტადიონზე.
მე-3 ადგილის გამოსავლენად ერთმანეთს შეხვდნენ სიმონეთის ,,კაჟელები" და შარშანდელი ფინალისტი ზედა სიმონეთის „მუზეუმი". შეხვედრა წარიმართა ამ უკანასკნელის უპირატესობით, რომლებმაც ოთხი უპასუხო გოლი გაუტანეს მეტოქეს და დაიკავეს მე-3 საპრიზო ადგილი.
ამის შემდეგ გაიმართა ფინალური შეხვედრა, სადაც შარშანდელმა გამარჯვებულმა ბარდუბნის „მერანმა" 6-0 დაამარცხა სიმონეთის „LMNTRIX" და ზედიზედ მეორედ დაეუფლა ქართლოს ჭუმბურიძის სახელობის თასს.

ფინალურ შეხვედრას ესწრებოდნენ ბატონები: თერჯოლის მუნიციპალიტეტის მერის მოვალეობის შემსრულებელი ლაშა გოგიაშვილი, მე-8 მოწვევის პარლამენტის წევრი დათო ლორთქიფანიძე, დეკანოზი მამა ამირან ქარქაშაძე, თერჯოლის მუნიციპალიტეტის მერის მოადგილე მანუჩარ რობაქიძე, თერჯოლის მერიის ადმინისტრაციული და შესყიდვების სამსახურის უფროსი მირზა ქოჩიაშვილი, განათლების, კულტურის, სპორტისა და ახალგაზრდული საქმეთა სამსახურის უფროსი გურამ თურქაძე, სოფელ ბარდუბნის მაჟორიტარი საკრებულოში გოჩა ვერულაშვილი, მერის წარმომადგენელი ბარდუბნის ადმინისტრაციულ ერთეულში მურად ვერულაშვილი, მერის წარმომადგენელი ზედა სიმონეთის ადმინისტრაციულ ერთეულში ზვიად ბაზაძე, სათემო უბნის სტადიონის დაამარსებელი ელგუჯა აბულაძე, იმერეთის რეგიონალური ფეხბურთის ფედერაციის პრეზიდენტი დავით რუხაძე და ირფფ-ს გენერალური მდივანი გივი ბაბუნიძე.

ტურნირში მონაწილეებს სიტყვით მიმართეს დავით რუხაძემ, ლაშა გოგიაშვილმა, დათო ლორთქიფანიძემ, დეკანოზმა ამირან ქარქაშაძემ და ელგუჯა აბულაძემ.
მათ ისაუბრეს ქართლოს ჭუმბურიძის სახელობის ტურნირის ჩატარების მნიშვნელობაზე, ქართლოსის პიროვნებაზე, ორგანიზატორულ ნიჭზე და მის მიერ გაწეულ ქველმოქმედებებზე, როგორც ქართული ფეხბურთის უანგარო მსახურზე. ასევე გუნდებს მადლობა გადაუხადეს ჩართულობაზე, თავდადებაზე და მერიის მხრიდან დაპირდნენ ხელშეწყობას მსგავს სპორტულ აქტივობებზე. მომავალ თაობას კი მოუწოდეს ჯანსაღი ცხოვრების არჩევა და სპორტულ აქტივობებში ჩართვა, რადგანაც სწორედ სოფლიდან მოდის ყველა წარმატება, რომელიც შესაძლოა არამარტო ქალაქს არამედ ქვეყანასაც გასცდეს.
ამის შემდეგ გაიმართა დაჯილდოების ცერემონიალი.

ტურნირის პრიზიორები გახდნენ:

1.„მერანი" ბარდუბანი - გარდამავალი თასი, I ადგილის თასი, დიპლომი და ბურთი გადასცა დავით რუხაძემ და ლაშა გოგიაშვილმა.
2.„LMNTRIX" სიმონეთი - II ადგილის თასი, დიპლომი და ბურთი გადასცა მანუჩარ რობაქიძემ.
3.„მუზეუმი" ზედა სიმონეთი - III ადგილის თასი, დიპლომი და ბურთი გადასცა მირზა ქოჩიაშვილმა.
4.ტურნირში მონაწილე დანარჩენ 5 გუნდს გადაეცა ბურთები - ბურთები გადასცა ოთარ ჭუმბურიძემ.

აგრეთვე დაჯილდოვდნენ ტურნირის გამორჩეული ფეხბურთელები, რომლებსაც გადაეცათ ინდივიდუალური პრიზები:

1.მაყურებლის სიმპატია - დათო ბრეგაძე („LMNTRIX") - პრიზი გადასცა გურამ თურქაძემ.
2.საუკეთესო მეკარე - ნიკა სულამანიძე („მუზეუმი") - პრიზი გადასცა გოჩა ვერულაშვილმა.
3.საუკეთესო მცველი - თამაზი გვენეტაძე („მერანი") - პრიზი გადასცა მურად ვერულაშვილმა.
4. საუკეთესო თავდამსხმელი - აკაკი ღვინეფაძე („LMNTRIX") - პრიზი გადასცა გივი ბაბუნიძემ.
5. საუკეთესო ბომბარდირი - ლაშა კეზევაძე („მერანი") - პრიზი გადასცა დათო ლორთქიფანიძემ.
6. საუკეთესო ფეხბურთელი - დიმა არეშიძე („მერანი") - პრიზი გადასცა გივი ბაბუნიძემ.
7. მსაჯები (მიხეილ კუპატაძე, ბაქარ ბრეგაძე) დაჯილდოვდნენ ბურთებით - ბურთები გადასცა ნუგზარ რუსიშვილმა.

----------------------------------------------------------------------------------------------------------------------------------------------------

საქართველოს ფეხბურთის ფედერაცია ფიფა-ს ახალ პროექტში - Bridging the Gap ჩაერთო

საქართველოს ფეხბურთის ფედერაცია ფიფა-ს ახალ პროექტში - Bridging the Gap - an analysis of the global football ecosystem ერთვება. საქართველოს ფეხბურთის ფედერაცია მსოფლიო მასშტაბით ერთ-ერთი პირველია, რომელიც ფიფამ აღნიშნულ პროექტში ჩართო.

Bridging the Gap მსოფლიო ფეხბურთის მმართველი ორგანოს „ტალანტების განვითარების“ პროგრამის ახალი პროექტია. მისი მთავარი მიზანია, რომ ფიფას წევრ ასოციაციებს ხელი შეუწყოს ქვეყანაში არსებული საფეხბურთო აკადემიებისა და სკოლების განვითარებაში, რაც თავისთავად ნიჭიერი ფეხბურთელების აღმოჩენასა და განვითარებას შეუწყობს ხელს. პროგრამის ფარგლებში ფიფა განახორციელებს სხვადასხვა სახის მხარდამჭერ პროგრამებს და საგანმანათლებლო პროგრამებს. პროექტის ფარგლებში ექსპერტები მონაწილე აკადემიებს საერთაშორისო გამოცდილებას გაუზიარებენ და დაეხმარებიან აღნიშნული პრაქტიკის დანერგვაში. ახალ პროგრამას ფიფა ტალანტების განვითარების კომპანია Double Pass-თან ერთად ახორციელებს.

პროექტში მონაწილეობის მისაღებად, საქართველოს ფეხბურთის ფედერაციამ ფიფას წარუდგინა 3 საფეხბურთო აკადემია და 10 საფეხბურთო სკოლა. სკოლები/აკადემიები ფიფას მიერ დადგენილი კრიტერიუმების მიხედვით შეირჩა. გარდა ტექნიკური პირობებისა, შერჩევის პროცესში გათვალისწინებული იყო ის სამი აკადემია, რომელიც საქართველოს ახალგაზრდულ ნაკრებს კადრებით რეგულარულად ამარაგებს. რაც შეეხება საფეხბურთო სკოლებს, კრიტერიუმების მიხედვით მათ უნდა ჰქონოდათ სხვებისგან გამორჩეული კარგი პირობები ფეხბურთელების წვრთნა-განათლებისთვის, მათ შორის, ქალთა ფეხბურთის განვითარების პოლიტიკა.

ფიფას პროექტში მონაწილე აკადემიებისა და სკოლების ჩამონათვალი:

1. დინამო თბილისი
2. ლოკომოტივი
3. საბურთალო
4. მარტვილის ფეხბურთის სკოლა: ბიჭები/გოგონები
5. ნორჩი დინამო მერანი: ბიჭები/გოგონები
6. ტორპედო
7. ბათუმის დინამო
8. ჩიხურა
9. გორი
10. სულაქველიძის აკადემია
11. 35-ე სკოლა
12. სამტრედია
13. წყალტუბო

ფიფასთვის საბოლოო სიის წარდგენისთვის სკოლებისა და აკადემიების შერჩევა 2018-19 წლის კატეგორიზაციის ციკლის შედეგებზე დაყრდნობით მოხდა.

საფეხბურთო სკოლების კატეგორიზაციის პროექტის 2 წლიანი საპილოტე ციკლი 2018-2019 წლებისთვის 2018 წელს ამოქმედდა. ამჟამად მიმდინარეობს 2020 წლის კატეგორიზაციის გარდამავალი ციკლი, რომელიც ივლისიდან ნოემბრამდე პერიოდს მოიცავს. უკვე მომავალი წლიდან კი, საქართველოს ფეხბურთის ფედერაცია კატეგორიზაციის რეგულარულ სამ წლიან ციკლზე გადავა.

მსოფლიო ფეხბურთის მმართველი ორგანოს ახალი პროექტი - Bridging the Gap საფეხბურთო აკადემიებს და სკოლებს განვითარების ახალ ეტაპზე გადასვლაში დაეხმარება. ფიფას ექსპერტები დეტალურად შეისწავლიან მონაწილეების არსებულ მდგომარეობას და ამაზე დაყრდნობით შეიმუშავებენ განვითარების გეგმას. Bridging the Gap-ის ფარგლებში აკადემიებსა და სკოლებში დასაქმებული მწვრთნელები სხვადასხვა სახის სასწავლო პროგრამებსაც გაივლიან.

Bridging the Gap ოთხი ფაზისგან შედგება. პირველი ფაზა, რომელიც მიმდინარე წლის თებერვალ-მარტში მიმდინარეობდა მოსამზადებელ სამუშაოებს მოიცავდა. მეორე ფაზის ფარგლებში აპრილიდან ოქტომბრის ჩათვლით ფიფას და Double Pass-ის წარმომადგენლები მონაწილეთა შესახებ დეტალურ ინფორმაციას მოაგროვებენ. 2020 წლის ბოლოს კი, მსოფლიო ფეხბურთის მმართველი ორგანო პროექტის მონაწილე საფეხბურთო ფედერაციებს და აკადემიებს და სკოლებს მომზდებულ ანგარიშს წარუდგენს. მეოთხე ფაზა, რომელიც ექსპერტების მიერ შედგენილი გეგმის იმპლემენტაციას ითვალისწინებს 2021 წლის იანვრიდან აიღებს სტარტს.

-----------------------------------------------------------------------------------------------------------------------------------------------

13 ივლისს კრისტალბეთ ეროვნული ლიგა 2 განახლდება!

კრისტალბეთ ეროვნული ლიგის განახლების შემდეგ, საქართველოს ფეხბურთის ფედერაციის გადაწყვეტილებით 13 ივლისიდან კრისტალბეთ ეროვნული ლიგა 2-ის 2020 წლის სეზონი გაგრძელდება. საქართველოს ეროვნული ჩემპიონატის რანგით მეორე ლიგა მესამე ტურის მატჩებით განახლდება. პირველ შეხვედრაში ერთმანეთს გათამაშების ლიდერი ქობულეთის "შუქურა" და ზუგდიდის "დინამო" დაუპირისპირდებიან. მატჩის პირდაპირ რეპორტაჟს გულშემატკივარი 18:00 საათიდან Silk Universal-ის ეთერში იხილავს.

კრისტალბეთ ეროვნულ ლიგა 2-თან ერთად ასევე იგეგმება ლიგა 3-ის განახლება, ტურნირი მეორე ტურის მატჩებით 27 ივლისიდან გაგრძლედება. ლიგა 4, რეგიონული ლიგა და დავით ყიფიანის სახელობის საქართველოს თასის გათამაშება კი, აგვისტოს შუა რიცხვებიდან დაიწყება.

აღნიშნული თემების შესახებ კომენტარი საქართველოს ფეხბურთის ფედერაციის გენერალურმა მდივანმა დავით მუჯირმა გააკეთა:

"კლუბებთან კომუნიკაციის შემდეგ მივიღეთ გადაწყვეტილება, რომ კრისტალბეთ ეროვნული ლიგა 2 13 ივლისიდან განახლდება. კრისტალბეთ ეროვნული ლიგის მსგავსად აღნიშნული ტურნირიც მესამე ტურიდან გაგრძელდება.

რაც შეეხება ეროვნული ჩემპიონატის დანარჩენ ლიგებს, ლიგა 3 27 ივლისიდან განახლდება. აგვისტოს შუა რიცხვებიდან კი, ლიგა 4-ის, რეგიონული ლიგის და დავით ყიფიანის სახელობის საქართველოს თასის გათამაშების დაწყება იგეგმება. ფუტსალის ლიგისა და ქალთა ლიგის შესახებ კი, ჩვენ კომუნიკაცია გვაქვს ფუტსალის ასოციაციასთან და ქალთა ფეხბურთის ფედერაციასთან.

ჩვენი მიზანია, რომ 2020 წელს დაგეგმილი ყველა პროექტი განვაახლოთ როგორც პროფესიული ასევე მასობრივი ფეხბურთის მიმართულებით.

რა თქმა უნდა, ყველა ლიგაში მოხდება ფორმატის ცვლილება. კრისტალბეთ ეროვნული ლიგა 2 და ლიგა 3 ოთხი წრის მაგივრად ორ წრედ გაიმართება, ლიგა 4-ში კი, განახლებული ფორმატი გვექნება. ამ ყველაფრის შესახებ რა თქმა უნდა, კლუბები ინფორმირებული იქნებიან. ასევე რეგიონულ ფედერაციებს მიეწოდებათ დეტალური ინფორმაცია იმის შესახებ თუ რა ფორმატით დაიწყება რეგიონული ლიგა."

-----------------------------------------------------------------------------------------------------------------------------------------------